Silang Alex ug Ivona

Di na bag-o ang audiobooks. Di lang sa personal computers, laptops ug labi na gyod sa cellular phones. Maoy gipaminaw sa mga natanggong sa trapiko o sa mga pantalan, terminal ug tugpahanan, o sa mga may tag-as nga mga biyahe sa yuta, dagat o hangin, o sa mga nag-ehersisyo.

Daghang audiobooks nga ma-download sa nagkalainlaing websites. Apan ang audio versions sa labing popular nga bag-ong mga libro di libre. Kinahanglang paliton gikan sa higanteng mga kompaniya sama sa Amazon, iTunes ug Google Play. Di sab kang kapatuyang og download og audiobooks labi na kon gamay na lang ang bakante sa memory sa imong telepono.

***

Tungod sa akong pagkatanggong sa among pinuy-anan sud na sa pila ka semana, nakat-on ko paggamit sa TTS (text-to-speech) nga feature sa telepono. Nga mobasa sa gaan nga text files sa mga libro ug ubang mga sinuwat nga di kinahanglan nga i-download ang mas bug-at nga audio versions.

Kasagarang reklamo sa unang mga nakasuway sa TTS mao nga mora kang naminaw og robot. Lata ug nagkamang ang tingog--mababaye man o malalaki. Apan tungod sa paspas nga paglambo sa teknolohiya, ni-arang-arang na ang TTS sa smart phones. Dagko hinuon ang files sa labing maayong TTS, dul-an sa usa ka gigabyte (GB), apan mora na gyong tinuod nga tawo ang nagbasa sa mga libro ug ubang sinuwat.

***

Labing maayong TTS nga akong nasuwayan mao ang Alex sa bag-ong iPhones ug iPads ug Ivona sa Android phones. Kon puno nang imong telepono, mahimong gamiton ang built-in nga TTS sa iPhones ug iPads (Siri) ug sa Android. Mas masabtan ang babaye nga UK English kay sa babaye ug lalaki nga US English.

Labihang sayona nga basahon ang iBooks: Hikapa lang ang unang pahina sa libro sa duha nimo ka tudlo gikan sa ibabaw paingon sa ubos, magsugod dayon og basa ang TTS. Sa Google Play Books, tuploka ang menu sa tuo nga ibabaw sa pahina ug pilia ang Read Aloud.

***

Gawas sa mga libro, mahimong ipabasa ang tag-as nga mga artikulo o bisan mga balita ug komentaryo sa nagkalainlaing websites. Kinahanglan lang nga moggamit sa libre nga web saving tools. Akong kinaham mao ang Pocket ug Instapaper, nga may bayad apan nagtanyag sab og libreng apps.

Mahimong magpili sa mga artikulo sud sa apps. O mokopya sa URL sa tag-as nga mga balita o komentaryo. Kasagaran sa websites may icons sa Pocket ug Instapaper. Inig abli nimo sa sinuwat sud sa apps, mahimong basahon sa TTS, tuploka ang “Listen” sa Pocket o ang “Speak” sa Instapaper. Mahimong mogamit og headset, mas maayong Bluetooth aron way alambreng magkawil-kawil. Way pagaw-pagaw nga motiwas pagbasa silang Alex ug Ivona. Bisan offline.